Әзілхан Нұршайықов. «Ақиқат пен аңыз» романы. Бірінші бөлім

  • 1.509-1
Әзілхан Нұршайықовтың «Ақиқат пен аңыз» романы қазақ прозасының өркендеуіне елеулі үлес қосты. Өйткені, роман диалог түрінде жазылып, көркем проза үшін тың жанрды дүниеге әкелді. Шығармадағы бүкіл оқиға автор мен кейіпкердің өзара әңгімесі арқылы өрбиді. Жазушы «Ақиқат пен аңыз» шығармасына Ұлы Отан соғысының даңқты батыры, гвардия полковнигі Бауыржан Момышұлының ғибратты ғұмырын арқау етіп алған. Автор өз кейіпкерінің сонау балалық шағынан бастап, білім алып, еңбекке араласуын, Ұлы Отан соғысына қатысып, батыр атануын, дивизия басқаруын, бейбіт күндегі әскери қызметін, жазушылыққа бет бұруын шынайы деректермен растай отырып, қызықты баяндайды. Автор кейіпкердің шынайы әңгімесін айна қатесіз беру арқылы оның образын сомдап шығады. Батырға лайық сес, қайсарлық, әділдік, кесіп айту, тура сөйлеу сынды қасиеттерін Бауыржан Момышұлының өз аузынан шыққан әр сөзі арқылы дәлелдеп, түйіндеп отырады. Атақты адамдардың сөзі, іс-әрекеті әдетте ел аузында қалады. Ал Бауыржан Момышұлы секілді тік мінезді, шыншыл, өжет, қайсар адамның әр қадамының халық арасына аңыз болып тарап кетуі заңдылық. Сондықтан, автор ел аузындағы аңыздар мен шындықты алма кезек, оқырман назарына ұсынады. Оқушы оқиға өрбіген сайын, батыр мінезі дараланған сайын ел аузындағы бұл аңыздардың ақиқат екендігіне көз жеткізеді. Шығарманың ішкі композициялық ерекшелігі де осында.
1081
128
Қате туралы хабарландыру