Жамбыл Жабаев. «Зілді бұйрық» өлеңі

  • 1.272
Жамбыл Жабаев 1916 жылғы 25 маусымдағы 19 – 31 жас аралығындағы ер азаматтарды соғыстың қара жұмысына алу туралы патша жарлығына қарсы ұлт-азаттық қозғалысқа белсене қатысып, бұқара халықтың қалың ортасында жүрген. Сол қозғалысқа арнап шығарған жалынды үндеу жырларының біразы ұмытылып қалып, «Патша әмірі тарылды» және «Зілді бұйрық» атты екі өлеңі ғана кейін хатқа түсіріліп алынған. Ақынның бұл шығармалары Құлансаз, Қарабастау жайлауындағы Қарғалы, Самсы, Ұзынағашта болған қақтығыстардан елес береді. «Зілді бұйрық» өлеңінде бұл тарихи оқиға нақты есімдер және жер-су аттарымен дәлелді берілген. Өлеңде Верныйда жандаралдар қылған бұйрыққа наразы болған халықтың ұстап жүрген оразаларын бұзып, ауыздарын ашып, Қарғалы өзенінің бойында бас біріктіргені, алайда оның ұйымдастырушыларын құрығы ұзын үкімет әскері тұтқындап абақтыға қамап, азаптағаны, олардың жағдайларын біле алмаған қарапайым халықтың одан кейінгі ашынған әрекеттері жырланады. «Аттандық ұлығының қонысына, Елді сорған борсықтай болысына. Көп ерлер қаза тапты жауға аттанып, Көксеген азаттықтың соғысында» деген жолдар патшаның қарулы әскерімен қақтығыста көп халық қырылғандығын айғақтайды. Бұл жырдан Жетісудағы ұлт-азаттық көтерілістің барысын, оның қандай сипат алғанын анық аңғаруға болады.
13730
368
Қате туралы хабарландыру