Ғабит Мүсірепов. «Ананың анасы» әңгімесі

  • 1.144
Ғ.Мүсірепов – қазақ әдебиетіне өзіндік өрнек салған қаламгер. «Ғабит Мүсірепов – қазақ әдеби тілінің зергері. Оның тілі, қазақ тілінің үнділігі мен нәрлілігін өз орнына қолдана білуі кез келген оқырманды таңғалдырады» деп жазады әдебиеттанушы З.Қабдолов. Қазақтың әйгілі жазушысы, қоғам қайраткері Ғабит Мүсірепов Қазіргі Солтүстік Қазақстан облысының Жамбыл ауданында дүниеге келген. Белгілі ұстаз Бекет Өтетілеуовтің шәкірті болу Ғабит Мүсіреповті әдебиет әлеміне келуіне көп ықпал етеді. Жазушының шығармаларының көбінде қазақ даласының тынысы танылып, саяси-әлеуметтік мәселелері қозғалады. «Тулаған толқында», «Қос Шалқар», «Өскен өркен», «Қазақ солдаты», «Ұлпан» т.б. шығармаларынан замана өткелдеріндегі адамзат қоғамының ішкі толқынын, жекелеген өмірлерге әсерін аңғаруға болады. Ғабит Мүсірепов ана тақырыбын кең қамтуымен де ерекшеленеді. Ана тақырыбындағы шығармалардың көркем галлареясын тудырған қаламгер қазақ мәдениетінің жауһар туындысы «Қыз Жібек» киносының сценарийін жазады. Жазушының қазақ драматургиясындағы сүбелі еңбегі де – уақыт тоздырмас асыл қазына. Ғабит Мүсіреповтың «Ананың анасы» әңгімесі Автордың «Ананың анасы» әңгімесі – ананың типтік образын сомдаған көркем туынды. Қазақтың жаугершілік заманының шежіресінде көркем өрілген ана махаббаты арқылы әлеуметтік теңсіздікті, қоғам бейнесін, адамдар тағдырын, адамзат өміріндегі ана рөлін автор мейлінше кең арнада танытады. Әңгіме бірнеше адамның баяндауында өрбиді. Әңгімедегі уақыт пен кеңістік те бірнешеу. Әңгіменің алғашқы баяндаушы кейіпкері шәкірт-бала қарт Әйтілестің әңгімесіне құлақ түрсе, қазына кеуде қарт та кезінде «іргеде отырып ойына тоқи беретін» құйма құлақ бала болғаны танылады. Қазақта көркем дүниенің мираскерлік сипаты да аңғарылады. «Қызды сатып алсаң да қатын, тартып алсаң да қатын» дейтін қоғамның бет-бейнесін автор мейлінше риясыз ашық көрсетеді. Басы бәйгеге тігіліп, бес қолдан өткен байғұс әйелге мұқалмас күш беретін де бір-ақ дүние. Ол – перзент тағдырына деген ананың байыз таппас жүрегі мен шексіз махаббаты. Ана парасаты мен өр рухына кез-келген сұрапыл күш қарсы тұра алмайтыны оқиға барысында анықталады. Ана қай ғасырда, қай жағдайда болсын ең биік тұлға. Егер қоғамда әйелдің рөлі төмен болса, ол анаға берілген баға емес, ол сол қоғамның әлеуметтік жағдайының төмендігін аңғартатынын автор ашық көрсетеді. Шығарма тілі көркем, образды. Шығармада көркем образдар типтік сипатта көрінеді.
8304
418
Қате туралы хабарландыру