Қазір балаларының денсаулығына кейбір ата-аналардың көңілі толмайтыны белгілі. Сонымен қатар дәрігерлер де өсіп келе жатқан баланың ағзасы мықты болуы үшін күнделікті дұрыс тамақтанып, жеке бас гигиенасын сақтап, салауатты өмір салтын ұстанып, денеге шамадан тыс артық салмақ түсірмеу керегін растап отыр.
«Нұр Отан» партиясы мемлекет басшысының тапсырмасы бойынша қазақстандық оқушылардың денсаулығын нығайтуға бағытталған бастамалық жобаларын әзірледі. Мектеп асханасын жаңғырту, дұрыс тамақтанудың мемлекеттік стандартын енгізу және спорт алаңдарын қайта жабдықтау жұмыстарынан бөлек, «Төменгі сынып оқушыларына арналған денсаулық сабағы» жобасы да дені сау ұрпақ өсіруге септігін тигізбек.
Сабақ басталар алдында оқушылар бес минуттық интерактивті жаттығулар жасайды, дұрыс тамақтану дағдылары мен алғашқы медициналық көмек көрсетуді үйренеді. Сондай-ақ бұл жоба оқушы денсаулығына жалпы қоғамның назарын аударып, өзекті де маңызды мәселелерді шешуге көмектеседі.
Оқушы денсаулығы – қазіргі замандағы көкейкесті мәселенің бірі. Өскелең ұрпақты тәрбиелеп, салауатты өмір салтына баулу керек, осы тұрғыдан ұстаздар қауымына да зор жауапкершілік артылған. Мұғалімдер мен сынып жетекшілеріне «Денсаулық сабағын» өткізуге көмекші құрал ретінде іріктелген материалдар топтамасын ұсынамыз.