Білім және ғылым министрі Асхат Аймағамбетов Online Mektep жобасының қатысушыларына алғыс айтты

Білім және ғылым министрі Асхат Аймағамбетов Online Mektep жобасының қатысушыларына алғыс айтты

Бүгін карантин жағдайындағы оқу жылының IV тоқсаны аяқталды. Төтенше жағдайға байланысты Қазақстан мектептері мен жоғары оқу орындары да жаппай қашықтан оқыту форматына көшкен еді. Осы орайда, мектеп оқушылары үшін Online Mektep жобасы қашықтан оқудың негізгі алаңына айналды, – деп хабарлайды ҚР Білім және ғылым министрлігінің баспасөз қызметі.

Жоба аясында 42 пән бойынша 3 мыңнан аса бейнесабақ, жиырма мыңға жуық жаттығу мен түрлі тапсырмалар әзірленіп, карантин кезінде мектептен қол үзіп қалған оқушылардың білімнен қол үзбей, қашықтан сапалы білім алуына мүмкіндік жасалды. Бүгін осы жұмыстарды қорытындылаған ҚР Білім және ғылым министрі Асхат Аймағамбетов карантин жағдайында 2 ай бойы демалыссыз жұмыс істеп, бейнесабақтар әзірлеген мамандармен кездесіп, оларға алғыс айтты.

ҚР Білім және ғылым министрлігі түсірілімге қатысатын мұғалімдерді іріктеп, сабақ сапасын қадағаласа, Bilim Media Group командасы сабақтардың түсірілім, аудио және монтаж жұмыстары мен жалпы техникалық сапасына жауапты болды. Жобаға жалпы 160 мұғалім, 40 әдіскер және компанияның 100-ден аса қызметкері қатысқан. Бейнесабақтарды дайындауға атсалысқан мұғалімдерге қаламақы, сонымен бірге төтенше жағдай кезіндегі жұмысы үшін сыйақы берілді. Осы тұста министр Асхат Аймағамбетов бұл жоба үшін Министрлік Bilim Media Group компаниясына қанша қаржы төлегені туралы сауал көпшілік көкейінде жүргенін, алайда мемлекет бюджетінен ешқандай қаржы жұмсалмағанын атап өтті. Жоба Bilim Media Group бастамасымен, компания қаржысы есебінен жүзеге асырылды. Министрлік ұйымдастыру жұмыстары мен әдістемелік бағыт бойынша қолдау көрсетті.

 

Бейнесабақтар 6 сәуір – 22 мамыр аралығында республикалық «Балапан», «Еларна» телеарналарынан көрсетілді. Сабақтардың аудиотрансляциясы «Қазақ радиосы» мен «Классика» радиолары арқылы таралды. Сонымен қатар бейнесабақтарды жобаның YouTube арнасынан да көруге мүмкіндік берілді. Ал BilimLand.kz платформасында сабақтарды қарау, интерактивті жаттығулар мен тесттерді, үй тапсырмаларын орындау, мұғаліммен кері байланыс жасау, жалпы толық электрондық оқыту қамтамасыз етілді. 

Bilim Media Group компаниясының директоры Рауан Кенжеханұлының айтуынша, 6 сәуірден бүгінге дейін BilimLand.kz платформасын 3,2 миллион адам қолданса, порталдағы бейнесабақтардың қаралымы 73,9 миллионнан асқан. Ал жобаның YouTube арнасы 2 жарым айға толмайтын уақытта 289 мың қолданушы жиып, қаралым саны 15,3 миллионға жеткен. «Бұл – төтенше жағдайдағы мемлекет пен бизнес серіктестігінің үлгісі, ынтымақтастықтың нәтижесі. Бізге сенім білдіргендеріңіз үшін алғыс айтамыз және еліміздегі білім сапасын, қолжетімділігін арттыру үшін жұмысымызды әрі қарай жалғастыра береміз, – деді Рауан Кенжеханұлы.